SHILLONG: Meghalaya a·dokni songadam nokadamrango donggipa nokdangrangna chirangko sale on·na man·na gita ma·mong sorkari, 2021-22 bilsini gisepo Jal Jeevan Mission (JJM)-ni kamrangna gong kror 170-mang ong·na sipile Meghalaya a·dokna chame on·attaiaha.
Mongolbar salo Jal Shakti Ministry-oni u·iatani gitade, Meghalaya a·dokna chamenggipa gimik gong kror 678.39 tangkarangoni gong kror 169.60 tangkarangko ia 2021-22 bilsini gisepo a·dokna watatmanaha.
Salgro salaram a·dokrango ta·rakbate namroro silroroaniko ra·bana miksonganio ia tangkarangko chamataha ineba Ministry-oni u·iataha.
2021-22 bilsini gisepo watatna sienggipa bakbrioni ian skanggipa bak ong·enga ineba kobor on·aha.
2021-22 bilsini gisepo gong kror 9,262 tangkarangko Jal Jeevan Mission-ni ning·o salgro salaram a·dokrangna central grant-ni bimingo chamataha aro ia tangka paisarangko chamatanichi salgro salaram a·dokrango da·o gita neng·nikanirangko chagrongna nangengmiting somoirango chirangko sale on·na man·anichi manderangna namgniko ra·bagen ine ka·dongenga.
Ia bilsini April jaona kingking a·dok sorkari, JJM-ni ning·o a·dok gimikni te 97,000 nokdangrangna chirangko sale on·na man·aha aro ia bilsio sorkari a·dok gimikni te 338903 nokdangrangna chirangko sale on·na man·aha.
2022 bilsini December jani gisepon a·dok sorkari Meghalaya a·dok gimikni te 589888 nokdangrangna chirangko sale on·na nisanko donsomanahachim.
