SHILLONG: Budbar salo a·dokni Chief Minister Conrad K Sangma, Shillong songjinmao Corona care centre dake jakkalna sienggipa biap damgittamko niangaha aro Covid man·e noktangtango dongna nangenggipa manderangko ia biaprango apjitskana man·na gita ta·raken ia biaprangko tarichina official-rangko ge·etangaha.
Shillong songjinmao Corona care centre dake jakkalna sienggipa biap damgittamara Malki-o donggipa Basic Training Centre, Rynjah-o donggipa Industrial Training Institute (ITI) aro Nongrim Hills-o donggipa District Commerce & Industries Centre (DCIC)-ni biap ong·a.
Malki-o donggipa Basic Training Centre-o komibeoba ge 100 palangrangko donna man·gen, Rynjah-o donggipa ITI-o komibeoba ge 45 palangrangko aro Nongrim Hills-ni DCIC-oba ge 60-mangni gita palangrangko donna man·gen ine u·iataha.
Kobor on·ani gitade, ia biap damgittamon mikkangchi palangrangko dondapna nanggenchimoba biaprangko apalbatatna man·gen aro ia corona care centre-rango COVID man·gipa manderangko sanna gita oxygen cylinder aro oxygen concentrator-rangkoba dongen.
Indake ong·engon iana skangba, a·dokni Chief Minister Conrad K Sangma, video conference gita dingtang dingtang a·jani deputy commissioner baksa agangrikangaha aro sabisi man·na altubatgipa biaprangko seoke tikarangko su·china ge·etaniko on·angaha.
