COVID man·e sianggiparangna Tg. hajal 50-ko Sorkari ka·sae on·gen

SHILLONG: A·doko, ia bilsi mija April 1 tarikoni jemangan COVID-19 sabisiko man·e siangahachim, uamangna Gong 50,000 tangkarangko Sorkari ka·sae on·pilgen ine Meghalaya Sorkari parakataha. Mija April 1 tarikoni intal jemangan a·dko COVID man·e siangachim, uamangna Gong hajal 50 tangkarangko ka·sae on·pilna gita A·dok Sorkari tik ka·aha ine Deputy Chief Minister, Prestone Tynsong Bristibaro parakataha.
A·doko COVID sabisi sanapchengaonin, sabisi man·e sianggipa pilakanade maina on·jaenga ine sing·anina aganchakengon, Sorkari sianggipa gimikni bimingkon napatnade skachim indiba sorkari da·sikkario kror 400 tangkarangko COVID-na koros ka·aha ine Pa Tynsong aganchakaha.
“Ia bilsio manderangni COVID sabisichi sinjetako man·aniko chanchiatenba, manderang gisikni gita namen neng·nikatako man·tokaha unigimin uamangna ka·sachakaniko mesokna gita sorkari iako dakna chanchiaha” ine Dy CM aganaha.
Pa Tynsong-ni u·iatani gitade, A·doko COVID-19 sabisiko man·e sianggiparang mija April 1 tarikoni chanbaede sak 340-350 mang ong·aha.
Ia sorkarini on·enggipa tangkako man·nara maiko dakna nanggen ine sing·anina aganchakengon, Pa Tynsong indake aganaha je sorkari ru·utgija somoirangni gisepon u·iataniko dakgen aro COVID man·e sianggiparangko namedake hisape on·china gita Deputy Commissioner-na aro District Medical aro Health Officer-rang Sorkari bilko on·gen.
Indake sianggiparangko namedake tik ong·e ma·sina ba hisap man·ani ja·mano, sorkariona de·e ranggen, uni ja·mano Sorkari, tangka paisarangko sianggipa manderangni nokdangrangna suale on·china gita cheque-ko DC-ona watatgen, Dy CM aganaha.
A·doko corona facility building-ko rikaniko Sorkari nange nikja ine mitam koborrango parakgipani bidingoba Deputy Chief Minister indake talataha je a·doko nanganirangko nigrikenba ia Corona health facility centre-rangko rikna gita sorkari tik ka·manaha.
Indakeba nikatna man·a je ia ge·gni facility centre-rangko rikna gita Ma·mong Sorkari, DoNER Ministry-ni gita kror 6.7 tangkarangko chamatman·aha.
Ia Corona health facility centre-rangoni ge·sako Shillongo aro ge·gipinko Turao rikgen jeon ge·prako ge 100 prak palangrang donggen.
Unomitingo, Deputy Chief Minister a·dok sorkarini palo, media-ko mittelpilaha, jeon uamangkoba frontline workers ba mikkangchake kam ka·giparang ine ra·enga aro sorkari uamangna rasong chaa, Pa Tynsong aganaha.