SHILLONG: Garo Hills-ni dingtang dingtang hospital, PHC aro CHC-rango kam ka·giparang chu·ongjaengani a·sel COVID-ko warachakanio dingtang dingtang neng·nikanirangko chagrongna nangengani gimin Garo Hills-ni dambonga a·jarango nanganirangko niroke kamko ka·na gita Special Committee for COVID Management-ko sorkari songe on·angaha.
COVID-19-ko warachakanio kamrangko nirok ka·dilna gita Meghalaya sorkari, sakbonga membor donggipa Special Committee for COVID Management-ko songe on·angaha aro ia committee-ko Garo Hills Region-ni Commissioner of Divisions Dr D Vijay Kumar, chairperson ong·e dilanggen ine Health & Family Welfare department-oni u·iataha.
Ia special committee-ni Senior Official-na Health Services (MCH&FW)-ni Joint Director Dr S Nongbri-ko donangaha aro ia committee-ni gipin sakgittam membor-rangara, Health Services (Garo Hills Unit)-ni Joint Director aro Tura Civil Hospital-ni Medical Superintendent Dr Minakshi Sangma, Social Welfare department-ni Director DD Shira aro H&FW Department-ni Joint Secretary DD Sangma ong·a ineba u·iataha.
Sorkari official-rangni u·iatani gitade, ia committee-ko dilna seoka man·gipa pilak membor-rangan an·tangtangna tikatgimin kamrangko ka·anggen.
