Shillong: Garo Hills Autonomous District Council (GHADC)-o kam ka·enggiparang adita somoirangonin dormaha man·kujaengani gimin golmal ong·engon Council-ni Chief Executive Membor (CEM) Benedic R Marak, Sonibar salo, “a·dok sorkari, minor mineral aro MV Tax-oniko jabongani advance-ko on·sona ka·dongataha,” ine parakataha.
Meghalaya-ni Chief Minister Conrad K Sangma-ni uni facebook page-ko watgipa video-o janapgipako parakate Marak indine aganaha, “GHADC-o kam ka·giparang dormaha man·gijaan ja 34 ong·engjok, iani bidingo Chief Minister baksa agangrikaha. Indake CM, minor mineral aro MV Tax-oniko jabongani advance -ko on·na ku·rachakataha. Mikkang antini gisepon tangkako watgen ine aganaha.”
Indake council-o kam ka·giparangko jingjengatako dontongate kamtangona re·bapilchina aro uamangni dormahako ra·chakechina mol·molataha. Kobor man·soani gita council-o kam ka·giparangni dormahako batanggimin bilsi gnio dingtang dingtang somoirango on·aha. GHADC-ni Non – Gazetted Employees Association (NGEA), gitcham EC-ni ku·chaka gitan uamangna revised pay scale-ko on·china dabiaha. NPP-ni dilanio rikgipa council-ni gitcham EC, council-o kam ka·giparangna 5th pay scale-ko on·na ku·rachakahachim.
Indake ong·engon Meghalaya CM, GHADC-ni mamlako nirokatna ka·dongataha. A·dok sorkari, Council-na dakchakgen ine aganaha. Council-o kam ka·giparang batanggimin jagittamonin, dormaha man·jani gimin jingjengatenga aro kamrangko ka·jaenga. Indake GHADC-o golmal ong·ako tom·tomatna Sonibar salo Chief Minister, Chief Executive Membor, Deputy CEM, aro District Council-ni Senior official, State Finance Department, Legal Department, DC Affairs aro Chief Secretary- uamang baksa tom·e chanchirimaha.
“Tom·anio, sorkarina council-ni chagrongenggipa chu·gimik mamlako u·iate on·aha, indake ong·engon GHADC, employee-rangna ku·chakgimin gita kam ka·na nanggen aro dormahako on·na nanga, indiba Council-ara autonomous body ong·e jakgittele kam ka·gipa ong·a, iakoba gisik ra·na gita nanggen, ine Chief Minister aganaha.
Financial-ara a·dok sorkari baksa nangdimja, uni gimin Council, an·tangan mamlako nirokna nanggen indiba sorkari chu·gimik dakchakaniko on·gen. Aro Executive Committee (EC), employee aro Council bakrime kam ka·na nanggen. Gital EC-ko rikaha, gital manderang napaha, uni gimin dingtanganiko ra·bana chol donga, ine aganatenba CM, council-o kam ka·giparangko kamtangona re·bapilchina mol·molataha.
