SHILLONG: Re·anggipa Robibar attamo East Jaintia Hills a·jani Umpleng jolo donggipa Krem Ule-ni koela a·kolo mande sakbonga gimaahani gimin, East Jaintia Hills a·jani district administration, magisterial inquiry-ko a·bachengatna siengaha ine kobor on·aha.
Iani bidingo East Jaintia Hills a·jani Additional District Magistrate MS Sangma, dingtangmancha jinmana u·iatenba, ia a·selni bidingo sakki on·na sikgipa manderangko re·bae on·echina gitaba didiataha.
“Ia a·selni bidingo tale ma·sigipa ba mikrontangchi nikgipa manderang donggenchimode re·baenggipa June-ni 8 tarik pring 11:00 bajioni attam 3:00 bajiona je somoioba Khliehriat-o donggipa DC office-ona re·bae an·tangtangni sakkirangko on·ena man·gen aro ua an·tangni bimingko ma·siatna sikjagenchimode darangnaba ma·siatjawa,” ine East Jaintia Hills a·jani ADC parakataha.
Robibar attamo Assam-oni mande sakbri aro Tripura-oni saksako man·chape gimik sakbonga manderang, feet 500-mang ong·gipa koela a·kolo gimaahachim.
Ia koela a·kolo gimagiparangko dingtang dingtang dolrang sandiengoba, ia koela a·kolo chi gapahani gimin koela a·kolo gimagipa manderang sienggnok ine official-rang chanchichipengachim.
