SHILLONG: Me·chik saksako drae til·eka ine matnangako man·ahani gimin North Tura-ni NPP MLA Thomas A Sangma-ko dingtang dingtang House Committee-rangoniko ra·galchina didie, Congress dolni MLA aro Assembly Empowerment of Women Committee-ni Chairperson Ampareen Lyngdoh, Meghalaya Legislative Assembly-ni Speaker Metbah Lyngdoh-na sedoataha.
Lyngdoh-ni parakatani gitade, Assembly-ni membor-rang iandake matnanganirangko man·on, a·doko songdongenggipa manderangni ka·donganiko ra·ongalani gita ong·a aro manderang iandakgipa kamrangna kakket bichalko pangnan nisengronga.
“Dilgiparang ong·e drae til·ekanina matnanganirangko man·aniara namen dukni katta ong·a aro anga Meghalaya Legislative Assembly-o women empowerment-ni chairperson ong·e dolgninan, mongsongbate me·chikrangna kakket bichalko on·na kamko ka·gen,” ine Congress MLA parakataha.
Ia a·selni bidingo police department, am·sandianirangko dakenba nanga gita ja·kurangko de·gen ine ua ka·dongenga ineba Lyngdoh parakataha.
“Ia a·selni bidingo ja·kurangko de·china aro kakketko ma·sina man·na gita anga DGP-naba u·iataha,” ine Lyngdoh parakataha.
Ia a·selni bidingo police-rangni am·sandianirang aro kachario bichal ka·anirang matchotkujaskal North Tura-ni MLA-ko Assembly Estimates Committee-ni chairman ong·aoniko aro Public Accounts Committee-ni membor ong·aoniko ra·galchina gitaba Assembly Empowerment of Women Committee-ni Chairperson, Assembly-ni Speaker-ko didiataha.
Lyngdoh-ni parakatani gitade, 2017 bilsioba Assembly-ni sakgipin membor Julius Dorphang-ni kosako drae til·ekanina matnangani somoioba uko Assembly-ni gitcham Speaker AT Mondal, Assembly committee-rangoniko ra·galahachim.
“Uni gimin anga bebera·a ia membor-ko ra·galchina angni didianiko na·a knachakgen aro uni kosako matnanganirangko a·dokni Director General of Police baksa am·sandianggen,” ine Congress MLA parakataha.
