SHILLONG: Meghalaya a·dokni dingtang dingtang biaprango aro mongsongbate East Khasi Hills a·jao lockdown-ko ra·gatani da·o jasa gapna siengahani gimin bang·bata manderangan lockdown-ko ra·galchina nangnikengoba, dingtang dingtang biaprango COVID man·aniko nichengesa lockdown-ko ra·galani giminde sorkari chanchianggen ine a·dokni Chief Minister Conrad K Sangma parakataha.
“Meghalaya a·doko da·o ka·sinsin COVID man·giparang komiangenga indiba an·ching pilakan mikrake donganiko watgalna nangkujawa,” ine Chief Minister parakataha.
Salsa salgnini gisepon a·doko COVID man·aniko sorkari nipilanggen aro uni ja·mano lockdown-ko ra·dodapgenma ra·galgenma ukode chanchianggen ineba Chief Minister parakataha.
Meghalaya a·dokni dingtang dingtang biaprango aro mongsongbate East Khasi Hills a·jao jagimikna lockdown-ko ra·gatani a·sel manderang neng·nikanirangko chagrongna nangtokengoba sorkari, ia changode tangka paisani gita dakchakanirangko on·skajaengachim.
“Beben, an·ching kangal cholgrirangni janggi tanganikoba niatna nangao ga·akenga indiba Meghalaya a·dokosan ong·aigija a·song gimikon ia sal somoirango tangka paisani gita neng·nikanirangko chagrongna nangenga. Iandakgipa obostao ong·engani giminsa sorkari manderangna tangka paisani gita dakchakanirangko on·na man·jaenga,” ine Chief Minister aganaha.
Cholrangko man·enga ong·ode sorkari dingtang dingtang cholrangchi manderangna dakchakanirangko on·skana jotton ka·enga ineba Chief Minister parakataha.
“Ian manderangnasan ong·aigija sorkarinaba neng·nikani somoi ong·enga,” ine Sangma aganaha.
Bilsi 18-oni bilsi 44 ong·gipa manderangna COVID-ni tikarang chu·ongjaengani gimin sing·on, a·song gimikon da·o dipet tikarang chu·ongjaenga indiba sorkari tikarangko taridapengaha ine Chief Minister parakataha.
“Ia jani gisepon chinga tikarangko man·sona ka·dongenga aro July jaode chu·onga gitan tikarangko man·na ka·dongengaha,” ine Chief Minister aganaha.
