Pilak kamna skangba GHADC employee-rangna dormaha on·chengna nanga: GGU

TURA: Garo Hills Autonomous District Council (GHADC)-o kam ka·enggiparang bilsi gittam ong·na sipile dormaharangko man·tokkujaengani a·sel neng·nikanirangko chagrongna nangtokengahani gimin, GHADC-ni gipin developmental ba namroro silroroatani kamrangko ka·na skangba kam ka·giparangnan dormaharangko matchote on·chengna nanga ine Garo Graduates Union (GGU), GHADC-ni gital executive committee-o dabiangaha.
Iani bidingo GHADC-ni chief executive membor (CEM) Benedic R Marak-na sedoatengon, GHADC-o kam ka·enggipa manderangsa pilak kamrangkon chu·sokatenggipa ong·a aro kam ka·enggiparangni dormaharangko on·chenggija gipin kamrangnasa tangka paisarangko jakkalaniara namen kragijani ong·a ine GGU-ni dilgiparang parakataha.
“GHADC-o kam ka·enggiparangna bilsi gittam ong·na sipile dormaharangko on·kujaengani gimin da·o uamang kamrangko ka·gija jingjengatengani a·sel Garo Hills-o pilak kamrangan bon·chongdika gita ong·engaha. Indita bilsini dormaharangko man·kujaengani a·sel kam ka·giparang aro uamangni nokdangrang badita duk mikchiko chakna nangenga uamangsa ma·sienga. Ia pilakan GHADC-o seokako man·e membor ong·anggipa manderangni a·selan ong·a ine chinga bebera·a. Uni gimin ia somoio chinga uamangni duk mikchiko ma·sichakchina aro uamangni dabienggipa dormaharangko on·china na·simangko mol·molenga,” ine GGU, GHADC-ni executive committee-ko didiataha.
GHADC-o kam ka·enggipa manderangni dormahana chamgipa tangka paisarangko gipin kamrangna jakkaljachina aro kam ka·enggiparangni dormaharangko on·namangmangsan jakkalchina gitaba GGU dabiangaha.
“GHADC-o kam ka·enggipa manderangni dormahana chamgipa tangka paisani sudrang da·o bilsi gittamni gisepo komibeoba bilsisani dormahakode on·na chu·onggen aro uamang bilsi gittamna dormaha gri kamko ka·na nangahaoba da·o uamangni dabienga gita komibeoba bilsisani dormahakode on·na nanga,” ine GGU parakataha.