SHILLONG: Congress Legislature Party (CLP) dilgipa Dr Mukul Sangma, party-ni gipin gipin MLA aro MDC-rang baksa Sukrobaro Tura Civil Hospital aro Turao donggipa Corona Care Center-ona re·angenba nirokeaha.
Dr Sangma, A·dokni dingtang dingtang district-rangona re·enba Hospital-rangni official aro staff-rang baksa agangrikanirangko dakenga aroba sana banani a·bao maikae tarisoenga uarang pilakkon nipilanirangko dakenga.
COVID sabisi sajinmako dakgrikchakna a·dok sorkarini tarisoani namen ja·manchakaha aro maibakae gittamgipa changna COVID sabisi a·dokona sokbataiode ua nambate tarisona nangenga ine Dr Sangma aganaha.
Ua indakeba sikkime aganaha je, gamchatgipa janggirangko chel·chakna da·odipet ge·sa ventilator-koba jakkalkuja, vetilator-rangko jakkalnagipa skie tarigimin mandean dongkuja. Indake a·dokni skotong songjinmaona agrede, gipin district-rangode, COVID man·e bilongdatgiparang indaken niwate dongako man·a gita dakenga, gitcham chief minister aganaha.
Iarangna agreba, saa bilonggiparangko nambata sana bananiko dakna gita Guwahati ba Shillong-ona ra·na gita, nokdangni manderang nangnikoba chu·gimik facility-rang donggipa ambulance-rangan dongjani a·selba neng·nikaniko man·enga, Dr Sangma aganaha.
Indake ong·engon, da·o giproroenggipa COVID sabisiko bilake warachakna man·na gita sanram biaprangko nambatatani aro uano chu·onga gita kam ka·giparangko rakkiani bidingo hisap ka·e on·china gitaba CLP dilgipa, West Garo Hills-ni doctor-rangko aro DC-ko aganaha.
