SHILLONG: Assam a·dokni Boko-o donggipa private godown damsaoniko, Shillong Food Corporation of India (FCI)-ni bag lak 1 merongko rim·aha indiba iani bidingo a·dokni official-rang maming kobor dongja ine parakatskaaha.
Boko jolo bol 13 truck garirangni re·ruraako nike songni manderang police-rangna u·iatani ja·man, ia godown-oniko merong bag lak 1-ko re·anggipa jaon rim·na man·ahachim. Truck garini driver-rangko sing·sandiani ja·man police-rang, ‘Maruti Quality Products Pvt Ltd’-ni godown-ko chadrapeaha. Ia company-ara Nestle multinational food company baksa nangrime kamko ka·gipa dol ong·achim ine kobor on·aha.
Ia FCI-ni merongrangko Maruti Quality Products Pvt Ltd, Continental Milkose India Ltd-ni bak ong·gipa aro Assam Rifle-na on·gipa ‘East Sunrise Brand’ bag-rango chipskaaha ine police-rang ma·sina man·aha.
Assam police-ni report-ko on·ani gitade, ia merongko FCI Meghalaya, Shillong Division, Wheat Based Nutrition Programme aro National Food Security Act 2013-ni ning·o Directorate of Social Welfare Meghalaya Shillong gita on·atahachim.
Iani bidingo Meghalaya a·dokni Food & Civil Supplies Minister aro Deputy Chief Minister Prestone Tynsong-o sing·sandiaton ia obostani bidingo ua an·tangde mamingkoba ma·sia dongja ine parakatskaaha.
Iani bidingo Assam police ba FCI-oniba a·dok sorkarina da·o dipet maming kobor on·aba dongkuja ine Tynsong parakataha.
Indake ong·engon, iani bidingo Assam-ni police-rang mokordoma ka·e am·sandianirangko dakna a·bachengataha ine Boko-ni police officer Sanjit Kumar Roy, kobor ra·timgiparangna parakatskaaha.
