SHILLONG: Da·ororo Coronavirus sabisini a·sel, a·gilsak gimikon sinjetaniko man·engon, service ba kamrangko man·tokjaengani bijatchio, bi·sarangko kam ka·ataniba batesa batroroenga. Batanggimin bilsi 12-nin, bi·sarangko nokkol a·ma gamataoniko chel·atna gita SPARK, rakbeen kamrangko ka·baenga aro ua gitan kam ka·atenggipa bi·sarangko bang·angrangkon naljokataha aro uamangko skulrangona rimbailaha ine SPARK-ni president aro founder Shima Modak aganaha.
Students Promoting Awareness of Research Knowledge Academic & Science (SPARK), uamangni manirongbaenga gita mijaloba ia bilsina donsogimin ‘‘Da·on kam ka·bo, Bi·sarangko kam ka·ataniko Bon·atbo’’ ine pangchakaniko doneba uamangni foundation day-ko mijalo maniangaha. Indake bi·sarangko uamangni mikkangchina tarisoani aro uamangko kam ka·atanirangko chel·chak naljokatanide ma·a parangni daitoan ine ineba Ms. Shima Modak gisik ra·ataniko dakangaha. Bi·sarangni namgnina tarisoanide ma·a paani dakgnian ineba ua aganaha.
SPARK, COVID protocol-rangko ja·rikenba uamangni salko maniaha, aro bi·sarangko kam ka·ataniko dontongbo aro bi·sa sakantina an·seng baljoke janggi tangna on·boe ine lekka pal·takrango seenba program ong·atanio bi·sarangba bakko ra·aha. Programko Bara Bazaar Slum aro Mawlong Song, Shillongo ong·atangaha.
