TURA: Zikzak-ni Non-Tribal MDC Aktar Ali-ko GHADC-o Forest Advisory Committee-ni chairman songani bidingo Garo Hills-ni dolbri NGO-rang, chong·motan GSU, AYWO, FAF aro FKJGP dolrangba raken jegalataha.
“GHADC-o kam ka·enggiparangni dormaharangko man·jaengani gimin jingjengatengmiting somoio mondolini dilgiparang aro Garo Hills-ni dingtang dingtang dolrangba namatpilna rakbee kamrangko ka·aha aro ia neng·nikanirangko GHADC-ni gital Executive Committee, namatpilna kam ka·gnok ine chinga ka·dongsoengachim. Indake ong·genchimoba, Zikzak-ni Non-Tribal MDC Aktar Ali-ko Forest Advisory Committee-ni chairman songahani gimin chinga NPP-chi dilenggipa EC-ni kamo namen suk ong·jaha,” ine dolbri NGO-rang parakataha.
Tribal ong·gijagipa manderangko district council-o dilgipa dake songaniara Constituency-ni Sixth Schedule-o Tribal-rangko chel·chakna on·gimin niamko pe·ani gita ong·engani gimin uamang skangonin district council-o Tribal ong·gijagipa manderangko dilgipa dake songaniko raken jegalengachim ineba dolbri NGO-rang parakataha.
“District council-o Tribal ong·gijagipa manderangni bak ra·paanian Sixth Schedule-o on·gimin niamrangko pe·ani gita ong·engachim aro iandake Non-Tribal MDC-ko Forest Advisory Committee-ni chairman songaniara Tribal-rangni bilko ra·sekani gita ong·aha,” ine NGO-rang parakataha.
NGO-rangni parakatani gitade, Tribal ong·gijagipa MDC-na ia kamko on·aniara Tribal MDC-rangko mikchepani gitaba ong·ahachim.
“Garo Hills-ni bol wa·arangko niam gri gipin biaprangona salanganirangko an·ching gimikan nikna man·enga aro bang·bata changon ia kamrangko Tribal ong·gijagipa manderangsa ka·batenga. Forest department-ko nambate chalaina man·genchimode council-na bang·a man·gnirangkoba man·dapgenchim aro iachi GHADC-ko bilakbatatna man·genchim. Uni gimin iandakgipa kamrangko Tribal MDC-rangna on·genchimode forest department-ko nambate chalaina man·gen ine chinga bebera·a,” ine NGO-rang parakataha.
Batanggimin somoirangoba iandake Non-Tribal MDC-na apsan dakgipa kamrangko on·ani ja·man dingtang dingtang dolrang, ua MDC-ko a·rikgalaha ine talatangengon, GHADC-o iandakgipa a·selrang ong·taijana gita ia Non-Tribal MDC-na on·gipa kamko ra·pile Tribal MDC-rangna on·skachina NGO-rang, NPP-chi dilenggipa Executive Committee-ko didiataha.
