SHILLONG: Meghalaya a·dok ning·o niam gri napdraenga ine Hynniewtrep Integrated Territorial Organisation (HITO), Assam sorkariko matnangenba, iani bidingo Meghalaya a·dokni Chief Minister Conrad K Sangma-na sedoataha.
HITO-ni parakatani gitade, West Jaintia Hills a·jani Khatkasla songo Assam sorkari, Border Police Outpost-ko songenba, Assam a·dokni dilgiparang, ia biapko nina re·baahachim.
Iani bidingo a·dokni Chief Minister Conrad Sangma-na sedoatengon, Assam sorkari, Meghalaya a·dok ning·o napdrana jotton ka·enga ine HITO matnangatenba, iani bidingo ta·raken ja·kuko de·china chief minister-ko didiataha.
Meghalaya a·dok ning·o miksongmanchaen Assam sorkari, napdrana jotton ka·enga ine matnangatengon, iandakgipa kamrangko Assam sorkari nikgija dake dongenga aro a·dok damgnini gisepo soi ka·grikaniko manijaenga ine HITO parakataha.
Salgro salaram a·dokrango aro mongsongbate Mizoram aro Nagaland a·dokrango Assam sorkari changni chang napdrana jotton ka·aha ine matnangatengon, iani bidingo gipin a·dokrang baksa agangrikenba, gipin a·dokrang baksa apsan ma·mongona re·ange badi ka·echina gita HITO-ni dilgiparang, a·dokni Chief Minister-ko didiataha.
Iandake Assam a·dokni napdrabana jotton ka·ani bidingo apsan meli nangrime ku·rangko on·china gitaba HITO, Meghalaya a·dokni dingtang dingtang NGO-rang, jatko dilenggiparangko aro a·dokni damgittam autonomous district council (ADC)-rangkoba didiangaha.
