TURA: Ia sal somoirango pilak biaprangon COVID-19 giproroengon, dingtang dingtang biaprangoni koela salgipa truck garirang re·baengani a·sel South Garo Hills a·jao songdongenggipa manderangna kenchakna nangani ong·enga ine Association for Democracy & Empowerment (ADE) Gasuapara regional unit parakatenba, sabisirang giproroengmiting somoio koela salgipa truck garirangni re·ruraanirangko chu·gimik champengatchina sorkario dabiangaha.
ADE Gasuapara regional unit-ni president Menward Sangma-ni parakatani gitade, ia sal somoirango COVID-19 giproroengani a·sel pilak biaprangon manderangni aro garirangni re·ruraanirangko champengengoba koela salgipa truck garirangde altuaen South Garo Hills a·jaona re·bana man·enga aro ian a·jao songdongenggipa manderangna namen kenchakna nangani ong·engachim.
“COVID-19-ni giproroaniko champengna gita a·dok gimikon dingtang dingtang niamrangko ra·gate manderangni aro garirangni re·ruraanirangkoba champengenga indide maini gimin koela salgipa truck garirangni re·ruraanirangko sorkari aro district administration nie dongskaenga?” ine ADE Gasuapara unit-ni president sing·doatenba, iandake gipin biaprangoni koela salgipa truck garirang skatang re·napbaengani a·sel Gasuapara-o aro South Garo Hills a·ja gimiko songdongenggipa manderangnan kenchakna nangani ong·enga ine talatangaha.
