TURA: Meghalaya police-ko man·chape dingtang dingtang sipai dolrangan mandena naljokaniko aro tom·tomaniko on·na rakbee kamrangko ka·engoba bang·bata somoion sorkariko dilgiparang aro dingtang dingtang politician-rang, sipairangko kragija dake jakkalrongenga ine A·chik Youth Council (AYC) parakatenba, sipairangko nambate jakkalchina sorkariko didiataha.
Iani bidingo Meghalaya a·dokni Chief Minister Conrad K Sangma-na sedoatengon, a·songo songdongenggipa manderangna naljokaniko on·na aro niam retiko rakkina gita sipai dolrangan walang salang neng·takpilgija kamko ka·enggiparang ong·achim indiba bang·bata changon seokako man·gipa dilgiparang, police-rangko an·tangtangni nokkolrang gita kragijagipa kamrangko ka·atronga aro ian sipairangna namen kragijani ong·enga ine AYC-ni general secretary Maxbirth Gabil Momin parakataha.
“Sipairang dongjagenchimode mandeara buringni niamrangko ja·rikani gitasan maming naljokani gri ong·aigenchim aro sipairangan walo saloba an·tangtang neng·takpilgija manderangna naljokaniko on·na kamko ka·engachim. Indake ong·genchimoba, an·chingni gisepo seokako man·gipa dilgiparang, bang·a changon uamangko mittelpilskaani pal aro uamangna krae dakani pal ong·gija kamrangkosa ka·atna jotton ka·skaronga,” ine AYC-ni general secretary parakataha.
Indake ong·engon, Meghalaya a·dokoba sipairangni mikkim rasongko rakkina man·na gita dingtangmancha niamko ra·gate on·na nangchongmotenga ine AYC, a·dokni Chief Minister-ko didiataha.
