SHILLONG: BJP Meghalaya, Sonibar salo State Executive Meeting tom·aniko ong·atangaha aro a·dok sorkariko, ma·mongni dingtang dingtang scheme aro programme-ko ra·gatani bidingo matnangaha.
BJP-ni Vice president, Bernard Marak, indine aganaha, “tom·ao political resolution-ko pass ka·anio, ma·mong sorkari, Prime Minister Narendra Modi-ni dilanio, maidakgipa ja·kuko de·aha, iani gimin u·iataniko gipatna party, kam ka·na re·mikkanggen.
Karyakarta ba party-na dangdike on·giparangni janapani gita, PM Narendra Modi-ni kangal cholgrirangko dakchakna ja·ku de·aniko a·dok sorkari, name dake ja·rikjaenga. Kangal cholgri dolna je scheme-rangko parakatahachim, ua sheme-ko ra·gata dongja, maina pandemic-ni somoio cholgri-apgri manderang man·a nanggni ration-ko man·tokja, PMAY-U-ni ning·o dam komigipa nokko rikna parakatgipa scheme-ba dongja, IHHL-ko a·bachengatan dongja, uandake job card donggiparangba account-tango hajirakon man·ja, kam ka·e cha·giparang aro bading-chiwale cha·giparang aditan neng·nikako chagrongna gita nangenga, uamangna mamingkon dakchakako man·jaenga. Bang·a contrat-o kam ka·gipa primary teacher, muster roll, contractual worker-rang kamoni ra·gala man·aha aro chatro-chatrirang mobile connectivity bilgriani gimin baditan neng·nikako chagrongenga aro chol man·pajae ramram smart phone-koba brena man·paja.”
Indake ong·engon hospital-rangoba oxygen tank-rang namja, sanna bannani koros aro dongchakani korosrangara agrea, una agreba bang·a changon oxygen-ni a·sel covid sagiparang sitoka, ineba Marak aganaha.
“Uandake State BJP, a·doko covid-ni obostako nirokna bilakgipa political resolution-ko pass ka·aha ma·mongni parakatgipa scheme aro programme-ko nirokna tik ka·aha. Minggipin BJP karyakarta-rang covid-ni koros aro ma·mongni scheme-ni bidingo RTI-ko file ka·ahachim jena da·onan aganchakaniko man·kuja.”
“Ma·mongo jekai BJP sorkari kamrangko ka·enga, ugitan a·dokoba apsan dake kam ka·angna jotton ka·gen, ine janapatenba, NPP-ni Jaintia Hills-ni sakgittam BJP MDC aro Garo Hills-oni saksa dilgipako jakkalani bidingoba Marak, sing·doataha.
State Executive Meeting-ko President Ernest Mawrie dilaha, jeon party-ni dal·dalgipa dilgiparang bak ra·aha.
