Shillong: MeECL Pensioners’ Association (MPA)-ni members of executive committee (EC), pension-ko on·china dabie Sombar salo Shillong Lumjingshai-o donggipa MeECL-ni office Headquater-o jingjengatna tik ka·aha. MeECL department-o re·anggipa April 2021 jarangoni an·tangtangni man·gnigipa pension-ni dormaharangko man·kujaengani gimin, MeECL Pensioners’ Association (MPA)-ni gita MeECL-ni Chairman-cum-Managing Director, aro a·dok sorkarini Power Minister baksa uamangna dormaha man·gnigipako ta·raken on·angchina gita agan-golpogrikangaha.
Uamangni agan-golpogrikangani somoio, department-ni official-rangko aro power minister-ko uamangni pension-ko man·jaenganichi ia covid sabisina lockdown-rangko ong·atani somoio namen neng·nikanirangko chagrongengani bidingo janapangahachim. Indiba uamangni dabianirang chu·soksranggipa ong·na man·jaha, ine koborna u·iataha.
Uandake, adita jarangna skangoni MeECL department-ni gita kamoni neng·takengako man·giparangni dormaha ba pension man·gniko on·jaengani gimin, uamangni janggi tanganio mongsongbate segri-pagrigipa manderang gipin cholko dake-rike cha·na man·jaengani gimin bang·a neng·nikairangkoba man·a nangenga ine MPA paakataha.
Association-ni EC, batanggimin June 17, 2021 tariko iani bidingo tangitik tom·e chanchirimani somoio, uamangni dabianiko sorkari ba department knachakjaode uamang jegale jingjengataniko dakna ineba tik ka·angaha.
Uamangni chanchirimanio, Association, an·tangtangni man·gnigipa dormaha ba pension-rangko batanggimin April 2021, jaoni man·gnigipako on·ja ong·ode EC membor-rang, MeECL-ni Head Quarter, Lumjingshai, Short Round Road, Shillong-o knal June 28, 2021 tariko jegale jingjengatna ineba tik ka·angskaaha.
Indake ong·engon, Meghalaya MPA dolni nangnike dabianiko sorkarini gita knachakjaode, mikkangchi uamangni ja·ku de·angna tik ka·giminrangara, a·doko MeECL-ni pension man·gniko on·ja ong·ode, ia mamlani bidingo a·dokosan ong·aigija gipin biaprangoba jegalani program-rangko dakna, batanggimin April aro May jani dormahako on·china dabiana agreba, mikkangchi uamangna on·gnigipa pension-rangko somoi gitan on·pachina ine uamang dabianikod dakangaha.
