TURA: MTET porikkako ong·atani bidingo Songsak Block Mission Coordinator (BMC)-ni kosako All Garo Hills SSA School Teachers Association (AGHSSASTA)-ni matnanganirangna ua talataniko on·angaha.
MTET porikkako ong·atani bidingo Songsak-ni BMC, niam gri u·iataniko on·aha ine adita salrangna skangsan AGHSSASTA matnangatenba, uni kosako a·dokni Education Minister-na badi ka·doangahachim ine nikna man·a.
Indake ong·engon, an·tangni kosako matnanganirangko Songsak-ni BMC jegalatenba, ia pilakan uni kamko skigiparangni ma·sisretani a·selsa ong·aha ine talataniko on·angskaaha.
“Anga Whatsapp gita Block Resource Centre-na reminder-kosa on·angahachim indiba notification-kode on·jahachim. Angni ma·siani gitade iako Songsak block-ni mitam SSA skigiparangsa ma·sisrete association-na u·iatskaahakon,” ine Songsak-ni BMC parakataha.
BMC-ni parakatani gitade, uni whatsapp gita message-ko watanio ua, SSA skigiparang MTET porikkako pass ka·na nanggen ineba janapani dongjachim.
“Saksa BMC ong·e anga block-ni ning·o donggipa skigiparangko nirokna nanga aro uamangna simsakna nangani giminsa 2010 bilsini August/September jani ja·man kamo seokako man·gipa skigiparangna dorgasto galani bon·kamgipa tarikni bidingo gisik ra·atanikosan on·angaiahachim. SSA skigiparangara NCTE-ni dongimin niamrango ga·akgiparangan ong·ani gimin angni message-o anga SSA skigiparangkode janapa dongjachim,” ine BMC talatangaha.
An·tangni kosako matnanganirangko maming pangchakani grigipasan ong·aia ine janapatengon, iano dal·batgipa official-rangni kosako re·badeani ba an·tangni bilko mesokani kattaba dongjachim ine Songsak-ni BMC parakataha.