TURA: West Garo Hills a·jao COVID-19-ni obostarango pangchake, a·jani ning·o donggipa mitam sorkari department-rangkode chu·gimik kam ka·piltaichina gita West Garo Hills a·jani Deputy Commissioner Ram Singh, ge·etaniko on·angaha.
Deputy Commissioner-ni u·iatani gitade, Deputy Commissioner baksa nangchapegipa department-rang, chong·motan Health & Family Welfare, Police, Food Civil Supplies & Consumer Affairs, Treasury, Information & Public Relations, Election, PWD, PHE aro pilak nangchongmotgipa department-rangan da·o chu·gimik staff-rangchi kamrangko ka·piltaignok.
Ma·mong sorkarini office-rang, bank-rang, post officer-rang aro gipin department-rangkoba da·o 50 percent staff baksa kamrangko ka·china Deputy Commissioner u·iataha.
Indake ong·engon, COVID-19-ko warachakna gita Health & Family Welfare department-ni dongimin niamrangko raken ja·rikangkuchina aro tikarangko su·e ra·tokchina gitaba ua dingtang dingtang office-ni dilgiparangna u·iataniko on·angaha.
