TURA: Garo Hills Autonomous District Council (GHADC)-o gitcham Secretary Rikse R Marak-ni jakkalgipa gariko Tura Police Station-o donchipengani gimin Non-Gazetted Employees Association (NGEA) sing·doangaha.
“Chingni dabiani gitan GHADC-ni gitcham Secretary Rikse R Marak-ko May jaon kamoniko watahachim indiba uko watani ja·man uni jakkalgipa ML-08G 3051 gariko da·onan Tura Police Station-o donchipenga,” ine NGEA-ni joint secretary Flaming B Marak parakataha.
Ia garini bidingo maiba case-rang dongkuengama ine uamang police-rango sing·sandiaton maming case-rang dongjaha ineba nikna man·ahachim ine NGEA parakataha.
NGEA-ni parakatani gitade, iani bidingo NGEA-ni membor-rang, GHADC-ni Joint Secretary aro Transport-ni in-charge-naba u·iatahachim indiba iani bidingo ua mamingkoba ma·sia dongja inesa ua aganchakaiahachim.
“Uni gimin ia gariara GHADC-ni ong·kuengama aro maini gimin ia Scorpio gariko Tura Police Station-o donchipenga, iarangni bidingo talate on·china chinga GHADC-ni Executive Committee-ko didienga. GHADC-ara Tribal-rangni bil aro daka rikaniko chel·chakgipa institute gitasa ong·ani gimin GHADC-ni gamrang pilakan Tribal-rangni gam gitasa ong·a. Uni gimin GHADC-ni bostu aro gam-jinrangko GHADC-ni dilgiparangan nirok sandina nanga,” ine NGEA-ni joint secretary parakataha.
