SHILLONG: Meghalayao lekka bidani a·bako namdapatna MDA sorkari bimchipe kam ka·na nanga ine Hills State Peoples’ Democratic Party (HSPDP) aganaha.
‘Education sector ba lekka bidani a·bako nambatatna gita sorkari krenge kam ka·aha ine sorkarini jakmako mikkang manderang nike aganna man·na gita, bimchipe kam ka·china chinga, sorkari baksa bakrimpagipa ong·e didianiko on·na ska,” HSPDP dilgipa PK Pangniang aganaha.
Ge·sa party ong·e iani bidingo uamang A·dok Sorkari baksa baditaba chang agangrikanirangko dakaha ine aganan baksa, ‘‘chinga namen kusi ong·a je, a·dokni education sector-ko tang·doatna gita a·dokni education minister, ua uni bil ama kakket kamrangko ka·enga ine chingna ku·chakaha aro ua ku·chaka gitan ka·enga ine ka·donga,” Pangniang aganaha.
Re·anggipa somoio, Performance Grading Index-ko parakatanio, NE-ni dambonga a·dokrang jedake- Meghalaya, Mizoram, Nagaland, Assam aro Arunachal Pradesh, a·dokrangba ja·manchakbatgipa list-o biming nakatahachim ine nikna man·a.
