TURA: North Garo Hills a·jao songdongenggipa manderangna COVID-19-oni naljoke dongna cholko on·na gita July 8 tarikoni July 14 tarikona tika su·ani program-ko dingtang dingtang biaprango ong·atenga.
Bilsi 18 batgimin manderang, maming neng·nikani grian COVID-ni tikarangko su·e ra·pana man·na gita ia tika su·ani program-ko North Garo Hills a·jani ning·o donggipa dingtang dingtang biaprango ong·atenga ine North Garo Hills a·jani official-rang parakataha.
Official-rangni u·iatani gitade, tikarangko Adokgre PHC, Bajengdoba PHC, Dainadubi PHC, Damas PHC, Gabil PHC, Kharkutta PHC, Manikganj PHC, Mendipathar PHC, Resubelpara CHC, Sualmari PHC, Wageasi PHC aro Rari PHC-ni ning·o donggipa dingtang dingtang biaprango su·e on·anggen aro manderang an·tangtangni sepangbatgipa centre-rangona re·ange tikarangko su·e ra·na man·gen.
Iani bidingo North Garo Hills a·jani District Administration, re·anggipa Budbar salo dingtang dingtang mondolini dilgiparang aro NGO-rang baksa Mendipathar Multipurpose Cooperative Society hall-o dingtangmancha tom·aniko ong·atangenba, songni manderangko aro dingtang dingtang biaprango songdongenggipa manderangko tika su·e ra·rikchina didiatskaaha.
