TURA: Tura Medical College-ko kulina gita 2013 bilsion parakahaoba da·onan be·en pil·kujaengani gimin ia medical college-ko kulina bangki dongkuenggipa kamrangko ta·raken matchotatchina gita Tura Garo Seniors Citizens Forum (TGSCF), Tura-ni MP Agatha K Sangma-na sedoataha.
TGSCF-ni parakatani gitade, Medical Council of India (MCI)-ni dongimin niamrango pangchake medical college-ni dingtang dingtang department-rangna ge 21 building-rangkode civil hospital-ni compound-on rikna gita nangengachim indiba Tura Civil Hospital-ni compound-o niam gri songdong a·chaenggipa nokdangrangko da·onan a·rikgalna man·kujae ia hospital-ni compound-o medical college-na nangchongmotgipa nokrangko rikna man·kujaengachim.
“Iani bidingo dolsni NGO-rang, chong·motan TGSCF, New Tura Development Forum, Nokma Council, Mothers Union, Garo Graduates Union, A·chik Literature Society aro Pensioners Union dolrang, 2018 bilsini July ba August jamango a·dokni Chief Minister Conrad K Sangma-ko Tura Civil Hospital-o gronge, Tura Civil Hospital-ni compound-o niam gri songdong a·chaenggipa nokdangrangko ta·raken a·rikgalchina aro medical college-ko kulina nangchongmotgipa kamrangko a·bachengatchina didiangahachim. Ua somoio Chief Minister an·tangba ia kamko jadokni gisepon matchotatgen ine ku·rachakaniko on·ahachim indiba da·o uni ku·rachakaoni bilsi gittam ong·pilengahaoba ua kamrangko chu·sokate on·chipkujaenga,” ine TGSCF-ni general secretary GC Momin parakatenba, Tura Medical College-ko ta·raken bimang ong·atna man·na gita ia kamrangko chu·sokate on·skachina Tura-ni MP-ko didiataha.
Tura-o budepa butchumarangko nirok sandigipa nokrangko kulie on·china gitaba TGSCF, Tura-ni MP-ko didiataha.
“Garo Hills-o aro mongsongbate Tura jillao maming nirok sandiani gri brange dongna nangenggipa butchuma budeparang bang·en donga. Ia butchuma budeparang, an·tangtangni ma·drang bakdrang aro dedrangrang donggenchimoba mitam nokdangrangode chol dongjani a·selo butchuma budeparang noktangtangoni ong·kate maming dakchakani gri ong·na nangtokenga. Uni gimin iandakgipa butchuma budeparangko simsak nirokna gita old age home-rangko Tura-o kulina nangenga,” ine TGSCF-ni general secretary didiatenba, iana uamang forum-ni gita Tura Goanang-o donggipa Forest department-ni Eco-Park-ko seoke donsoenga ine parakataha.
Indake ong·engon, adita salrangna skang, Delhi aro Haryana a·doko A·chik chadambe sakgnini ong·na kragija bewalo siangahani giminba TGSCF suk ong·gijaniko parakataha aro ia a·selni bidingo kakketko ma·sina man·na gita jakgitele inquiry-ko dakatchina Tura-ni MP-ko didiataha.
