TURA: Ma·mong sorkarini Consumer Affairs, Food & Distribution Ministry-ni u·iatanio pangchake NFSA (PHH &AYY)-ni namgniko man·enggipa manderang, NFSA-ni bosturangko ra·na man·na gita Electronic Point of Sale (ePOS)-o Aadhar Authentication-ko dakna an·tangtangni Aadhar nombor-rangko on·na nanga ine West Garo Hills a·jani Deputy Commissioner (Supply) u·iataha.
Uandaken NFSA-ni namgnirangko man·enggipa manderangko ePOS gita kakket ong·a ine ma·sina man·na gita aro asol beneficiary-rangna NFSA 2013-ni ning·o mirongrangko on·na man·na gita India sorkari, Aadhar-na biming segataniko July 1 tarikoni September 30 tarikona ra·dodapataha ine Deputy Commissioner (Supply) u·iataha.
Iani bidingo NFSA-ni beneficiary-rangko ba namgniko man·enggipa manderangko aro mongsongbate be·enni gita cholgri ong·gipa ba butchuma budeparangko Aadhar-na biming segataniko bilakbatatchina gita West Garo Hills a·jani UIDAI Nodal Officer, ge·etaniko on·ataha.
