SHILLONG: Union Home Minister Amit Shah, re·baenggipa July 17 tariko Meghalaya a·dokona re·bagen ine parakmanahaoba da·o uni a·dokona re·baani tarikko ra·doattaiaha ine kobor on·aha.
Meghalaya a·dokni Health Minister AL Hek-ni Robibar attamo parakatani gitade, Union Home Minister-ni Shillong-ona re·baani tarikko dingtangattaiaha aro ua da·o antisamangni ja·manosa re·baskanaba dongaha.
Amit Shah-ni Shillong-ona re·baani somoio Inner Line Permit (ILP)-ko man·chape a·doko nangchongmotenggipa dingtang dingtang kamrangni gimin agangrikgen ine adita salrangna skangsan, a·dokni Chief Minister Conrad K Sangma parakatahachim.
Chief Minister-ni parakatani gitade, Union Home Minister salgnina a·dokona re·baani ong·engachim aro uni a·dokona re·baanio ua dingtang dingtang project-rangkoba a·bachengate on·angjolna siengachim.
Amit Shah, a·dokni skotong Shillong songjinmaona re·baengani gimin a·doko ILP-ko ra·gate on·china dabienggipa dingtang dingtang dolrangnaba somoiko on·china gita Home Ministry-ko didiataha ineba Chief Minister aganahachim.
Indake ong·engon, Meghalaya a·doko songdongenggipa manderang ILP-ko man·na ka·donge dongtokengani gimin a·dokna ILP-ko ra·gate on·na man·ama man·jawa kakketko aganchina gita Nongpoh-ni Congress MLA Mayralborn Syiem, ma·mong sorkario dabiangaha.
“Union Home Minister-ni a·dokona re·baani somoio ILP-ni giminba agangrikgen ine a·doko songdongenggipa manderang ka·donge nisengtokenga. Uni gimin ILP-ko chinga man·genma man·jawa, kakketko aganchina chinga nangnikenga,” ine Syiem parakataha.
Manderangni nangnikaniko ma·mong sorkari ma·sichaka ong·ode ta·raken ILP-ko ra·gate on·na nanga ineba ua aganaha.
Meghalaya a·doko songdongenggipa manderangni dabianiko ma·mong sorkari knachakjagenchimode ba iako ru·utate rochaenga ong·ode BJP-ni ‘Sabka Saath Sabka Vikas’ ingipa kattara Meghalaya a·dokna ong·jaenga indiba salgro salaramni gipin a·dokrang, jekai Nagaland, Mizoram, Arunachal Pradesh aro Manipur a·dokrangnasan ong·enga ineba Congress MLA parakataha.
Union Home Minister-ni a·dokona re·baani somoio ILP baksana a·dok damgnini simarango meligrikgijanirangko namatna gitaba agangrikanggen ineba ua an·tangni ka·dongchakenganiko parakataha.
