SHILLONG: A·doko COVID tikkarangko su·na gita Sorkarini re·mikkanganio manderangna didianiko on·na gita legislator-rangko aro tribal council-rangni seokgimin memborrangko jakkalenga ine Meghalaya Chief Minister Chief Minister, Conrad Sangma, mijalo Prime MInister Narendra Modi-na parakataha.
Meghalayao COVID tikkarangko su·anio ja·manchakengani gimin suk ong·brejao mangba, da·o September bon·achi ong·jaoba October ja a·bachengaonade salanti 20,000-25,000 COVID-19 tikkarangko su·enba, tikka su·na bilsokgiminrangko su·mantokgen ine Chief Minister, ka·dongsoani kattako aganaha.
PM Modi, mijalo NE gimikni chief minister-rang baksa a·dokrango ong·enggipa COVID sabisini obostarangni gimin agangrikangaha.
‘‘National average ba a·songni gadango gitade chinga ja·man chakrikengkua. Tikka su·anio ta·rakbatna aro chu·sokna man·na gita MLA-rangko, district council-ni memborrang (MDC), toromni dilgiparangko, songni dilgiparangko, civil society-ko kamo jak on·pachina gita aganman·aha. Re·baenggipa antirango ba ja-rangode tikka su·giparang bang·batgnok ine chinga ka·dongenga,’’ Pa Sangma aganaha.
Chief Minister indakeba aganaha je mande jelgipa biaprango COVID sabisi man·giparang bang·bataha indiba bakan komiangpilengaha. ‘‘Songadamrango sabisi bang·baten gipengaha aro komiangna gita bang·en somoi nangengjok. Re·baenggipa bang·gija antirangni ja·mande sabisirang da·o gita ong·jawajok ine niksoenga,’’ Pa Sangma aganaha.
Da·omitingo, East Khasi Hills aro West Jaintia Hills district-rango positivity rate 10 per cent batenga ine saksa a·gipi health official aganaha.
Ia sabisi sajinmako dakgrikchakna gita oxygen cylinder, oxygen concentrator, health equipment ba sana banani nanggipa bosturangna agreba Ma·mong ge 14 oxygen plant-rangkoba on·e dakchakaha ine chief minister aganaha.
