SHILLONG: Samtangtango donggipa buring bolgrim, chiring chibisik aro uandake pilak ong·telaigiparangko ripinge rakkina gisiko nanggipa manderang baksa nangrime a·doko dingtanganiko ra·bapilna gita sorkari ja·kuko de·chakataha.
Iani bidingo a·dokni Forest & Environment Minister James K Sangma, Mongolbar salo, Naba Bhattacharjee, Morningstar Khongthaw aro Nicholas J Kharmani-ko gronge, maikai a·doko buring bolgrimrangko tangatpilna aro ding·a sin·ani batroroaniko dingtangatna man·gen, uarangni bidingo agangrikangaha ine kobor on·timgiparang u·iataha.
“Mikkangchi a·doko dingtanganiko ra·bana gita manderangni nangnikani aro agan-ku·pattianirangkoba ra·e ja·kurangko de·na man·na gita anga a·doko sorkari baksa bakrime kam ka·gipa manderang nangnikenga. COVID-19-ni a·sel an·ching pilakan pilak kamrangon ja·donggaatako man·na nangengahani gimin an·ching ku·cholsan kamko ka·na nangenga,” ine Forest Minister parakataha.
Meghalaya a·dokni buring bolgrimrangko ripinge rakkianio a·doko songdongenggipa Tribal jatrangni daka rikaniko ja·rikna nangengani gimin a·dokni saksa gitcham forest officer Naba Bhattacharjee, sorkarina ku·pattianiko on·angskaaha.
“An·ching samtangtango donggipa buring bolgrimrangko, chiring chibisikrangko aro pilak ong·telaigiparangko tangatpiltaina aro ripinge rakkina nangenga ong·ode Khasi, Jaintia aro Garo manderangni bebera·ani aro daka rikanirangko tangatchengna nanggen,” ine Bhattacharjee aganaha.
Indake ong·engon, chatro chatrirangna environment ba samtangtango ong·telaigiparangni gimin skie on·engon, uamangna jakchi dake nianirangko chol on·china gita Living Bridge Foundation-ko kulidilgipa Morningstar Khongthaw, sorkarina ku·pattianiko on·angskaaha.
Apsan daken, Partners of Plaw Iew-ko kulidilchenggipa Nicholas J Kharnami-ba, a·dokni samtangtango ong·telaigiparangko tangatpilna gitade, jatni gimagimin daka rikanirangkon tangatpilchengna nanggen ine sorkarina ku·pattianiko on·angaha
