Bazar antirango manderangni skatang tom·dakaniranga kenchakna nangani ong·enga: PM Modi

NEW DELHI: Mongolbar salo India a·songni Prime Minister Narendra Modi, salgro salaramni chief minister-rang baksa video conference gita agan-chanchirimangengon, salgro salaram a·dokrango aro mongsongbate bazar antidamrango manderang mask-rang gangija aro saksa sakgipinoni chel·tanggrikaniko rakkigija jinma tom·anirangara namen kenchakna nangani ong·enga ine parakataha.
Gittamgipa changna COVID-19-ni giproroaniko champengsona gita salgro salaramni pilak a·dokrangon tikarangko su·chichaangkuchina gitaba Modi didiataha.
Ia internet gita tom·aniko ong·atanio Assam, Nagaland, Tripura, Sikkim, Manipur, Meghalaya, Arunachal Pradesh aro Mizoram a·dokrangni chief minister-rang bakko ra·angaha aro ia tom·anio Union Home Minister Amit Shah baksana Union Health Minister Mansukh Mandaviya-ba dongpae bakko ra·angahachim.
Video conference gita salgro salaramni chief minister-rang baksa agangrikangengon, gittamgipa changna COVID-19-ni giproroaniko champengsona man·na gita COVID-ko warachakna dongimin niamrangko raken ja·rikangkuchina Prime Minister Modi, salgro salaram a·dokrango songdongenggipa manderangko didiataha.
“Corona-ni a·sel tourism aro bading chiwalanirang namen tang·onatako man·engaha indiba da·o dipet salgro salaram a·dokrango aro mongsongbate bazar antirango mask-rangko gangija jinma tom·dakanirangko dakani ong·kujaenga,” ine Modi aganaha.
Gittamgipa changna COVID-19-ni giproroaniko champengsona gita pilakan ku·cholsan ong·e kamko ka·na nangenga ineba ua didianiko on·angaha.
Coronavirus-ni rokom mingantikon name nirikkina nangenga ine janapatengon, jo·ongrang dingtang ong·ani ja·man maikai mandena namgijaniko ra·bana man·a, uko ma·sina gita u·i-ma·sigipa manderang am·sandijringenga indiba iandakgipa obostarangode chel·chakani aro sanna bananiko on·anian namen nangchongmotgipa ong·enga ine a·songni Prime Minister parakataha.
“An·ching porikka ra·ani aro sanna banani cholrangko nambatatanichi re·mikkangna nangenga aro iani bidingo cabinet, adita salrangna skangsan gong kror 23,000-ni gital cholrangko ra·chakmanaha. Salgro salaram a·dokrangoba ia cholrangko ra·e porikka ra·ani aro sanna bananirangko namdapatna man·gen,” ine Modi aganaha.
Salgro salaram a·dokrangni mitam a·jarangode obostarang namjabatenga ine janapatengon, jo·ongrangni giproroaniko champengna gita mikrake kamrangko ka·china ua chief minister-rangko didiataha.
“An·ching COVID-19-ni batrikrikaniko champengna gita tika su·anikoba ta·rakbatatna nangenga,” ineba PM Modi aganaha.