TURA: Tura-ni MDC Bernard N Marak-ba da·o COVID-ni tika ponggnikon su·e ra·manahani gimin ia tikani bidingo manderangna talatanirangko on·na gita aro COVID-19 sabisini bidingo manderangna mikrakatanirangko on·na gita dingtangmancha awareness program-rangko ong·atna miksongenga ine jinmana parakataha.
Marak-ni parakatani gitade, bang·bata manderangan COVID-19 tikani bidingo ong·gija dake ma·sisretengani gimin aro tikarangko su·na gong·tokjaengani gimin ua kal·susaani, git ring·susaani, chroksusaani aro uandakgipa program-rangko ong·ate ia COVID tikani bidingo manderangna talatanirangko on·na miksongenga.
“Ia sal somoirango an·chingni gisepo kenbegnigipa sabisi giproroengani gimin an·ching pilakan an·tangtangko bilake, ka·donge aro ma·sisretani gri sorkarini on·enggipa tikarangko su·e ra·na nangenga. Tikarangko su·ani bidingo ma·sisretengani a·selan bang·a janggirang gimana gita nangengaha. Uni gimin manderangna ia tikarangni gimin talate on·na nangchongmotenga,” ine Tura-ni MDC parakataha.
Ia program-rangko ong·atna gita una pu·ongipa manderangoni dakchake on·na kusi ong·enga ineba Marak parakataha.
Indake ong·genchimoba, drae tika su·ataniko ua ong·nikja ineba Marak talataniko on·angaha.
