TURA: Garo Hills-ni gam-jinrangko aro pilak daka rikanirangko ripinge rakkina gita Garo Hills Autonomous District Council (GHADC)-ko donmanahaoba, GHADC-ni Chisobibra guest house-o donggipa bolrangko niam gri ratskaengani gimin Tura-ni MDC Bernard N Marak, GHADC-ko dilenggipa Executive Committee-ni membor-rango sing·doangaha.
Koborko man·soani gitade, ia Chisobibra guest house-o donggipa bolsal aro segun bolrangko komibeoba pangbrikode, maming permission ra·chengani grian den·ahachim.
Iani bidingo Bernard Marak-ni facebook-o tapatgipa noksarangoniko niksona man·ani gitade, ia Chisobibra guest house-o donggipa bolrangko den·e, gipin biaprangona salangna gita ua biapon rate chimongengachim.
“Chingni ia biapo kam ka·giparangko sing·sandion, uamangna ku·sikchisa bolrangko ratchina aganaiaha ine uamang aganchakaha indiba ku·sikmangmangchi aganaianade uamang maina bolrangko den·na nanga? Angni chanchichipani gitade ia kamo bol badinggiparang aro GHADC-ko chalaienggipa mitam dilgiparang jak dongna nanga,” ine Marak, an·tangni suk ong·gijaniko parakataha.
Indake ong·engon, ia biapo bol den·e donaniko social media-rango giproroangani ja·man, Forest department-ni manderang re·bae, ia bolrangko Rongrenggre-ona ra·angaha ine kobor on·timgiparang u·iataha.
Ia bolrangko sawa den·china ge·etaha ine sing·doangengon, ia kamo jak donggipa mandeni kosako rakgipa ja·kurangko de·china Tura-ni MDC, GHADC-ni Executive Committee-ko didiataha.
GHADC-ni Chisobibra guest house-o niam gri bolrangko ratenganina Tura-ni MDC sing·doa
Date:
Share post:
