SHILLONG: Meghalaya a·doko batanggimin 2020 April jaoni, COVID-19 sabisi napchengaoni da·alona sak 2,800 bi·sarang COVID-19 sabisiko man·aha aro uamangoni rasong grie sak 15 bi·sarang uamangni janggirangko gimaataha, je a·selan Meghalayana minggipin jajrengani ong·enga.
Health Services (DHS)-ni retired Director aro corona care centre-ni in-charge Dr Hunsi Giri agana je, COVID man·gipa bi·sarang bang·bataon bang·a bang·ja saanirangko nikna man·a.
“COVID sabisi man·gipa bi·sarangoni bang·gijarangsan bilsue sagiparangde dongaia,” Dr. Giri koborni manderangna aganaha.
Gittamgipa changni COVID-19-na tarisoengani bidingo sing·anina aganchakengon, A·dok Sorkari miksonggimin Paediatric Intensive Care Unit (PICUs)-rangko a·dokni dingtang dingtang district-rango rikna ja·ku de·enga ine Dr Giri aganaha.
Dr. Giri indakeba aganaha je Ganesh Das Hospital-o PICU-ko rikna agangipako rikengaha aro bakgittamni bakgni kamrangde matchotengaha.
Ua indakeba u·iataha je a·dokni dam 11 district-rangoni, dam 8 district-rangosan PICU-rangko rikna man·aigen, maina gipin damgittam district-rangode pediatric doctor-rang dongja, uarangara North Garo Hills, South West Khasi Hills aro South West Garo Hills district-rang ong·a.
Dr Giri-ni aganani gitade ia damgittam district-rango High Dependency Unit (HDUs)-rango donggen.
Indakeba nikatna man·a je Ma·mongni Home Minister, Amit Shah Shillongona re·mitingo, mija Sonibaro saksni tuchakani a·dam gnanggipa PICU-ko COVID-19 Step Down Hospital, Umsawli-o nokdonggae donangaha.
