M’laya aro Assam-ni simarango songdonggiparangna chel·chakaniko on·china Cong didia

SHILLONG: Meghalaya aro Assam a·dokni sima arirango meligrikna man·jaengani a·sel sima jolrango songdongenggipa manderang neng·nikanirangko chagrongna nangtokengani gimin ta·raken ja·kuko de·e ia jolrango songdongenggipa manderangna chel·chakaniko on·china a·dokni Congress dol, Meghalaya sorkariko didiangaha.
Ia sima arirango meligrikna man·jaengani a·sel jolo songdongenggipa manderang neng·nikanirangko chagrongna nangtokengani gimin Mongolbar salo a·dokni Congress Legislature Party (CLP) tom·e chanchirimangenba, sima arirango songdongenggipa manderangni namgnina ta·raken ja·kuko de·china a·dok sorkariko didiataha.
CLP-ni tom·aniko Opposition dolni dilgipa Mukul Sangma dilangaha aro tom·anio dingtang dingtang Congress MLA-rang bakko ra·angaha.
Ia tom·aniko ong·atani bidingo Opposition dolni dilgipa Mukul Sangma, kobor ra·timgiparangna talatangengon, a·dok damgnini sima arirango meligrikna man·jaengani a·sel jolo songdongenggipa manderang duk saknaanirangko chakna nangengoba a·dok sorkari maming chel·chakanirangko on·na ja·kurangko de·kujaengani gimin Congress dolni MLA-rang ia tom·anio cholrangko sandina chanchirimangaha ine parakataha.
An·tangni chief minister ong·engmiting somoion gitcham Congress sorkari, a·dok damgnini gisepo meligrikna man·jaenggipa biaprangko sandie, pilak nangchongmota lekkarangko Assam sorkarina on·atmanahachim indiba da·o ong·enggipa Meghalaya sorkari, iani bidingo Assam sorkari baksa agangrika dongjani a·selsa da·onan ia neng·nikanirangko namatna man·kujaenga ineba Sangma, NPP-chi dilenggipa MDA sorkariko matnangataha.
Re·baenggipa Sukrobar salo Assam aro Meghalaya a·dokni chief minister-rang, iani bidingo tom·e agangriktaina siengani gimin sima arirango songdongenggipa manderangni namgnina ja·kuko de·china gitaba ua a·dokni Chief Minister-ko didiataha.
Salgro salaram a·dokrangna NESAC-ni gita dingtangmancha simarangko sale on·na miksongenggipani bidingo sing·on, gitcham Meghalaya sorkarini Assam-na on·atgipa lekkarango pangchake simarangko salna man·gen ine Sangma ku·pattianiko on·ataha.
Budbar salo ua Iongkhuli songona re·ange niegen ineba Opposition dolni dilgipa parakataha.
Adita salrangna skangsan, Iongkhuli songo Meghalaya Energy Corporation Limited (MeECL)-ni songe dongimin bijoli krongrangko Assam police-rangni pe·e galani ja·man dolgnini gisepo adita ding·chaogrikani ong·angahachim.