TURA: Garo Hills Autonomous District Council (GHADC)-ni executive membor (EM) Dhormonath Ch Sangma-ko kragija dake doka ine matnanganiko Tura-ni BJP MDC Bernard N Marak jegalatenba, Tura constituency-na tangka paisarangko komie chamahani giminsa ua EM aro official-rang baksa ding·chaogrike jegrikahachim ine talataniko on·angaha.
“Anga darangkoba jak soka dongja indiba uamangni ong·gija kamrangko anga champengengani giminsa uamang angko tol·e matnangna jotton ka·enga. Tura constituency-na gong lak 9.70-mangmangko chamahani giminsa anga uamang baksa jegrikaha maina ia tangkarangara Tura-o CC footpath-kosan tarina chu·ongaigenchim,” ine Marak parakataha.
Tura MDC-ni parakatani gitade, Tura constituency-o namroro silroroatani kamrangna gong kror 1.57 tangkarangko ia gital Executive Committee (EC) chamaha ine agananiara kakket ong·ja maina ia tangkarangko GHADC-ni MDC quarter-rangko taridapnasa chamskaaha aro Tura-na MDC-ni tarigipa project proposal-rangkode ia EC jechakskaahachim.
“15th Finance Commission-ni ning·o tarigipa gitcham tender-rangkode uamang den·gale an·tangtangni contractor-rangnasa gital tender-rangko on·aha. Ma·mongoni chamatgipa tangka paisarangkode uamang quarter-rangko taridapnasan jakkalenga aro angni Tura-o donggipa dingtang dingtang gittimrangna aro self help group-rangna tarigipa project proposal-rangkode uamang jegalskaaha,” ine Marak parakataha.
GHADC-o ong·enggipa obostarangko niatchina gitaba ua a·dokni Chief Minister Conrad K Sangma aro BJP-ni Meghalaya in-charge Chuba Ao-ko didiataha.
Re·anggipa Sukrobar salo, Tura-ni BJP MDC Bernard Marak, kragija dake GHADC-ni EM Dhormonath Sangma-ko jak sokaha aro officer-rangkoba ku·wattogija kattarangchi sauaha ine uni kosako FIR ka·doangahachim. Iani bidingo GHADC-ni chief executive membor (CEM) Benedic Marak-ba BJP-ni national vice president aro Meghalaya-ni in-charge M Chuba Ao-na sedoatenba, Tura MDC-ni kosako nanga gita ja·kurangko de·china didiatahachim.
