JOWAI: East Jaintia Hills-ni Sutnga Elaka-ni ning·ogipa dingtang dingtang songni ritcha manderang ong·katchimongenba, Environment Coordination Committee (ECC), Sunga Elaka-ni gita mijalo 1 Kilo-oni EJH-ni Deputy Commissioner Office-ona kingking tom·tome re·jomaniko dakenba East Jaintia Hills-ni Sutnga Elaka-ni ning·o donggipa Coke Factory-rangni kosako jegalaniko dakangaha.
ECC dilgiparangni u·iatani gitade, uamangni Elakao coke factory-rangko bang·en bikotroroenga aro RTI ka·e man·ani gitade, Meghalaya State Pullution Control Board (MSPCB)-ni gita, Sorkari dam 49 coke factory-rangna bilko on·aaha aro uarangoni dam 39-de Sutnga Elaka-ni Umthe, Sookilo aro Umpleng jolrangon donga.
“Ia factory-rangoni ong·katgipa wal·kurang ia a·jolni balwako namen moila ong·ata aro ian a·jolni manderangna namgipa chin ong·ja,” ECC dilgiparang aganaha.
Ja·mano ECC dilgiparang Deputy Commissioner, E Kharmalki-ko uni office chamber-o grongaha, jean ong·enga obostarangko nirokna gita manderangko watatna gita ku·rachakataha.
Uamangni re·jome jegalanio a·joltangni MLA, Shitlang Pale aro gitcham JHADC CEM, Hambertus Nongtdu aro Rangbah Shnong-rangba dongpaaha.
