TURA: West Garo Hills a·jani Rongsai-o donggipa Garo Hills Autonomous District Council (GHADC)-ni Beat Office-ko ru·uta bilsirangonin maming taridapani gri galchipe donengani a·sel da·o ia jolrangko Assam a·dok kangdrana jotton ka·engaha ine Garoland State Movement Committee (GSMC) Pedaldoba regional unit parakatenba, mikkangchi ia office-an simani sakki ong·na man·na gita ta·raken ia beat office-ko taridapenba ia office-o kamrangko ka·taipilchina gita GHADC-ni Chief Exective Membor (CEM) Benedic R Marak-ko didiataha.
“Da·ororo a·dok damgnini simarango meligrikgijanirang ong·engon, Rongsai songo donggipa GHADC-ni beat office-koba Assam a·dok ning·o kangdrana jotton ka·engaha. Indake ong·genchimoba ia office batanggimin somoirangon nosto ong·ahani a·sel kam ka·giparangba ia biapo donge kamrangko ka·na man·jaenga aro beat office-ko chipketesa donna nangenga,” ine GSMC Pedaldoba unit-ni chairman Rimjen Ch Sangma parakatenba, ia office nokko ta·raken taripilenba kamrangko ka·chakchina gita GHADC-ni CEM-ko didiataha.
Sangma-ni parakatani gitade, Garo Hills ning·o donggipa bigha 100-na batpilen a·arangko Assam kangsepengaha aro mikkangchi iandake kangdrae ra·aniko champengna gita ia biapo GHADC-ni Beat Office-ko nangchongmotengachim.
“Uni gimin mikkangchi ia office-an simani sakki ong·na man·na gita ta·raken ia office-ko taripile kamrangko ka·china chinga mol·molatenga,” ine GSMC Pedaldoba regional unit-ni chairman parakataha.
