TURA: North Garo Hills a·jani Nishangram Babupara songo niam gri chalaienggipa saw mill ba bol ratani karkanako State Forest department-ni official-rang chipataha ine kobor on·aha.
Kobor on·timgiparangni u·iatani gitade, ia saw mill ba bol ratani karkanako ia jolrango niam gri bol pale cha·gipa manderangni dakchakanichi Assam-ni adita sak manderang chalaiengachim aro ia songo niam gri bol ratani karkanako chalaienga ine kobor man·soani ja·man Forest department-ni official-rang, police-rang baksa ia songona re·ange ia saw mill-ko chipe donataha.
North Garo Hills a·jaoba niam gri bol ratani karkanarangko chalaiengani a·selan manderang, joltangtango donggipa bol wa·arangko skatang den·e ia karkanarangna pale cha·skaengachim aro uandaken bang·bata biaprangon aro mongsongbate Dainadubi jolrango buring bolgrimrangni porongrong ong·anganiko nikna man·engahachim ine jolo songdongenggipa manderang parakataha.
Ia saw mill-ko chipe donatahani gimin Forest official-rangko mittelpilangengon, mikkangchi iandake skatang bol pale cha·aniko champengna gita gipin biaprango niam gri chalaienggipa saw mill-rangkoba chipatchina gita jolni manderang didiataha.
