SHILLONG: COVID-19 giproroan baksana dingtang dingtang a·selrangchi a·doko bobil dake chakatgipa Hynniewtrep National Liberation Council (HNLC) dol baksa sorkari agangrikna man·kujaenga ine Chief Minister-ni advisor aro BJP MLA AL Hek parakataha.
Batanggimin bilsirangonin HNLC bobil dol, tom·tomaona re·bapilna nangnikenganiko parakengani gimin Hek an·tangan HNLC bobil dolko ma·mong sorkari baksa agangrikdilna ku·rachakahachim ine nikna man·a.
“Meghalaya a·dokko chinga tom·tomgipa a·dok ong·atna nangnikenga aro iana chinga ta·raken bobil dol aro ma·mong sorkarini gisepo agangrikaniko dakdilna nangengachim,” ine Hek parakataha.
A·doko tom·tomaniko rakkianiara sorkarini daitoan ong·a ine talatangengon, ma·mong sorkari baksa tom·tomani bidingo agangrikna gita HNLC dol, una u·iataha ine Hek parakataha.
Re·anggipa 2020 bilsion an·tangni Health minister ong·engmiting somoio AL Hek, HNLC bobil dolko ma·mong sorkari baksa agangrikdilna parakahachim indiba Union Home Ministry-ni dongimin niamrangko ja·rikskachina gita HNLC dolko didiatahachim.
Uandaken, re·anggipa bilsini October jao ua Home-ni gitcham Minister of State G Kishan Reddy-koba gronge, HNLC bobil dolni agangrikna on·enganiko parakahachim.
“A·doko manderangni saknaanirangko chinga nikna sikjaengaha. A·doko bobil dake chakatgipa dolrang dongangkua ong·ode mande so·otani aro mande rim·gittanganirangko nikna nangkuaigen. Uni gimin chinga Meghalaya a·doko iandakgipa kamrangko nangnikjaengaha,” ine Chief Minister-ni adviser aganaha.
