TURA: Meghalaya a·dok gimikon COVID-19-ni giproroaniko champengna gita Sonibar aro Robibar salrango salgnina chu·gimik lockdown-ko ra·gatengon, re·anggipa Robibar salo North Garo Hills a·jani Snalgre songo, dokkanrangko chipatani gimin songni manderang, police-rang baksa adita nanggrikaha ine kobor on·aha.
Koborko on·ani gitade, Snalgre songo manigija dokkanrangko kulienga ine koborko man·soani ja·man dolsa police-rang, ua biapona re·angenba dokkanrangko chipchina aganeahachim indiba ua somoio songni manderang ka·a ding·chaoenba, police-rang baksa jegrikna a·bachengaha aro dolgni nanggrikanio police-rangni gari bolsa adita nosto ka·ako man·aha.
Dolgni nanggrikanio darangba saknaanirangko man·ade dongjaha indiba police-rangni gariko chadrapanio jak donggipa adita sak manderangni kosako police-rang mokordoma ka·aha ine kobor on·aha.
“Manderangni neng·nikanirangko chinga ma·sichakenga indiba pilakni namgninan ia lockdown-ko ra·gatenga. Sorkarini ge·etaniko manigija dakaniara nama ong·ja uni gimin chinga iani bidingo mokordomako ka·na nangaha. Ia a·selni bidingo talbate ma·sina chinga ning·tue am·sandianirangkoba dakengkua,” ine North Garo Hills a·jani SP AT Sangma, kobor ra·timgiparangna parakataha.
