SHILLONG: Ia sal somoirango COVID-19 giproroaniko champengna gita jinma tom·anirangko dakna on·kujaengani gimin sorkarini gital bikote on·gipa Mairang district-ko August-ni 15 tarikode do·ga okujawa ine a·dokni Cabinet Minister aro Mawthadraishan-ni MLA Brolding Nongsiej parakataha.
Meghalaya a·dokni Chief Minister Conrad K Sangma-ni parakatani gita, Mairang aro Mawthadraishan constituency-rangko Mairang district-ni ning·o donatgen ine janapatengon, manderang jinma tom·na man·ahaosa ua gital district-ko do·ga oe on·na nangnikenga ine Nongsiej parakataha.
“Gital district-ko do·ga oe on·ani somoio manderang bang·jagenchimode inditana kusini dongjawa aro chinga ia gital Mairang district-ko do·ga oe on·ani somoio constituency damgnini manderangko kusi ong·e rimchaksoanikosa nangnikenga,” ine Mawthadraishan-ni MLA parakataha.
Ia gital district-ni headquarter-na seokako man·gipa Pyndenumiong-ba da·o dipet containment zone-o ga·akengani gimin ia gital district-ko da·o dipet do·ga oe on·na man·kujawa ineba ua parakataha.
Nongsiej-ni aganani gitade, COVID-19 giproroengkuani gimin ia gital district-ko August jaode do·ga oe on·na man·kujawa.
“Ia August jaode gital district-ko do·ga ona gita somoirang namkujaenga. Uni gimin chinga somoiko September ba October jarangona ra·doatna nangnaba gnang. Da·o dipet Mairang district-ko do·ga ona gita chinga somoiko name tik ka·na man·kujawa aro COVID-ni obostarangko nichengna nanggen. Anga bebera·a manderang iako ma·sichakenba chakchike sengkugen,” ine Nongsiej parakataha.
