TURA: All Garo Hills Joint Action Committee (AGHJAC) aro Garo Hills-ni nangrimgimin dingtang dingtang NGO-rang Assam-o donggipa sak lak 8 A·chik jatrangna, Assam sorkarini on·a ku·atgimin gita Garo Development Council-oni Garo Autonomous Council (GAC) dakatskataichina aro a·doko kam on·anio seokanio a·kange ra·china ine janape Assam, sorkarini Deputy Speaker, Dr. Numal Momin-ko gronge una Memorandum-ko on·angaha.
All Garo Hills Joint Action Committee (AGHJAC), H. Q. Tura-ni dilgiparang aro bakrimgimin gipin NOG-rang baksa jemangan mejalo Assam Legislative Assembly-ni Deputy Speaker Dr. Numal Momin-ko Guwahati-o donggipa uni dongchakram noko gronge una memorandum on·anggiparangara; AGHJAC-ni chairman aro Delhi A’Chik Youth Association-ni chairman gitcham president, Mr. Roger Benny A. Sangma, AGHJAC-ni convenor, Mr. Balkarin Ch. Marak, GSU, Eastern Zone Williamnagar-ni president Mr. Saljrang Tengrik R. Marak, GSU, H. Q. Tura-ni president, Mr. Zikko Balgra N. Marak, GSMC Garobadha unit-ni president, Mr. Ryan Ch. Marak aro gipin NGO dilgiparangan ong·enga.
Nangrimgimin NGO dilgiparang, Assam-ni saksakamkam A·chik MLA, Dr. Numal Momin-o uni party-ni dilgiparang aro uni ka·rimska apsan gadangni minister-rang baksa agangrike Assam-o donggipa A·chik jatrangni mikkangchini namgnina kamko ka·dilangskachina aro Garo Autonomous Council (GAC-ko on·china dabidile on·a nangchongmotengani bidingoba agan-golpogrikangaha ine koborna parakataha.
Apsan somoio nangrimgimin NGO-rang, ia sal somoirango a·dok damsa damgipin baksa nangtikgrikgipa sima-ari jolrango, jeon A·chik songrang dongachim, uarangna maming kajia-golmalrangko sokatgija kamrangko ka·dilangskachina gitaba Assam-ni Deputy Speaker baksa agan-golpogrikangenba kamrangko nirokatchina uko didiangaha.
Indake ong·engon, AGHJAC-ni adviser Roger Benny A Sangma-ni agan-janapatgimin katta bi·chongo pangchake, GSMC-ni Convener Balkarin Ch Marak-ba Assamo donggipa A·chik jatrangko Assam sorkario kamna okamanio bilsini gita galchange kam tikatgijaengani bidingoba, mikkangchi A·chik jatrangna dingtangmancha kamna a·kange on·china ine dabidilchina ineba uko didiangjolaha.
Indake ong·engon, uamang dolgnini gisepo gronge agan-golpogrikanirangko chu·sokatna ka·donganiko on·anichi, uamangni gronge agan-golpogrikaniko namen chu·sokatna man·aha ineba koborna parakataha.
