SHILLONG: Robibaro, Hynniewtrep National Liberation Council (HNLC) gitcham general secretary, Cheristerfield Thangkhiew-ko gopani salo hajal man-derang re·jomaniko dak-angaha.
Indake Mawlai Kynton-o donggipa uni nokoniko Thangkhiew-ko Lawmalio donggipa Motsyiar Church of God-ni gopramona ra·angmitingo Mawlaio ramasamo manderang tom·dakenba sianggipa Thangkhiew-na mande-ra·aniko dakrikaha.
Thangkhiew-ko gopna ra·angani somoio Mawlai Nongpdeng-ko napjole jinma re·jomaha, je biapon ua dal·achim. Gopna ra·ang-miting somoio me·chikrang aro bi·sarangba bakko ra·aha, gopna ra·angmiting somoio, bobil dolko mitel-enba ‘‘HNLC tangbachina’’ aro ‘‘Bah Che tangbang-china’’ ine chrik a·bok-angtokaha.
Adita chasongrangna gimachipani ja·mano, da·o manderangni parak ong·e chakpaaniko man·enba HNLC da·o gital dake chakattaina bilko man·aha.
Thangkiew-ko gopani salo darang political dilgip-aba bakko ra·gipa dong-jaha, indakoba dingtang dingtang pressure group-ni dilgiparang re·bae bakko ra·angtokaha, indake uko gopani salo golmalrangba ong·ahachim.
