SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) bobil dolko tom·tomaona re·bapilna cholko on·na gita sorkari baksa agangrikna dingtangmancha committee-ko songe on·china Meghalaya a·dokko nirokenggipa BJP-ni dilgipa M Chuba Ao, NPP-chi dilenggipa MDA sorkariko didiangaha.
Meghalaya a·doko tom·tomaniko rakkiangna gita dolgnini gisepo agangrikaniko be·en pil·atna gitade committee-ko songchengna nanggen ine Ao aganaha.
Shillong songjinmao so·sojengjeng ong·angani gimin an·tangni suk ong·gijaniko parakatengon, iani bidingo ua ma·mongo BJP-ko dilenggiparangna u·iatmanaha ine Ao parakataha.
Meghalaya a·doko ong·enggipa obostarangna BJP dol, MDA baksa bakrimaniko ra·pilgenma ine sing·on, ia obostani bidingo NPP-chi dilenggipa MDA sorkario bakrimaniko ra·pilna nangani katta dongja ine BJP-ni dilgipa parakataha.
MDA-ni gisepo apsan chanchirimchengani gride darangba MDA-o bakrimaniko ra·pilna man·kujawa ineba Ao aganaha.
Adita salrangna skang, HNLC bobil dolni gitcham general secretary Cheristerfield Thangkhiew-ko police-rangni so·ote galani gimin manderang jegale re·anggipa Robibar salo jingjengatanirangko dakanichi adita so·sojengjeng ong·anirangko nikna man·ahachim.
