SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) dolni gitcham general secretary Cheristerfield Thangkhiew-ko police-rangni so·otgalanian HNLC dolni tom·tomanina sorkari baksa agangrikna nangnikaniko bon·atani gita ong·aha ine HNLC-ni publicity secretary Sainkupar Nongtraw parakataha.
Agangrikna gita sorkari niamko dongenchimode HNLC, sorkari baksa agangrikna man·jawaha ineba HNLC-ni dilgipa, social media-o jinmana parakataha.
Sorkari baksa agangriknade HNLC bobil dol, maming niamrangko donna nangjawa ine sorkari aganengon, sorkariba niamrangko dongenchimode HNLC dol sorkari baksa agangrikna man·jawa ine aganskaengachim.
Tom·tomaona re·bapilna gita sorkari baksa agangriknade maming niamrangko donna nangjawa ine adita salrangna skangsan, Meghalaya a·dokni Chief Minister Conrad K Sangma parakatahachim.
Batanggimin somoirango HNLC bobil dolni sorkari baksa agangrikna on·atgipa chittirango ‘Standstill Agreement’ aro ‘Instrument of Accession’-o pangchakesa agangrikna seatahani gimin ia niamrangara sorkarini ra·chakna man·gijagipa niamrangsa ong·a ine Chief Minister, ia niamrangko den·galpilchina HNLC-ko didiatahachim.
HNLC bobil dol agangrikna re·baengon, so·sojengjeng ong·atani kamrangko dontongchengna nanggen aro a·songni dongimin niamrango pangchakesa agangrikna nanggen ineba Chief Minister aganahachim.
