SHILLONG: Opposition chief whip aro Congress MLA, PT Sawkmie, uni constituency-o tom·tomaniko ra·bana gita, Sombaro Mawlai-ni dingtang dingtang NGO-rangko grongenba chanchidilaniko dakangaha aro tom·tomanikora·bana kam ka·china gitaba didianiko on·aha aro tom·anio bakko ra·agipa NGO-rangba MLA-ni ku·pattianiko dakna gita ra·chakaha.
NGO-rang baksa agangrikaniko dakani ja·mano koborni manderangna talatskaengaon, HNLC bobil dolni gitcham dilgipa Cheristerfield Thangkhiew-ko so·otani a·selko a·dok sorkarini, judcial-chi sandiatna am·anikoba uamang ra·chaka ineba Sawkmie aganaha. Unbaksana, Mawlaioniko CRPF camp-ko sorkarini apjitna chanchianikoba uamang namnika ineba aganaha.
Indake ong·genchimboba, name jakgitele a·selrangko sandirokna man·na gita so·otanio jak donggipa officer-rangkode kamoniko dondipatchina chinga dabia. Indakoba sandirokanio officer-rango maming dosiko man·jaode kamona rimnapilgen, Sawkmie aganaha.
