SHILLONG: East Khasi Hills aro Jaintia Hills a·jarango sorkarini champengatgimin Hynniewtrep National Liberation Council (HNLC) bobil dol, so·sojengjeng ong·atani kamrangko ka·engon, Garo Hills-oba adita salrangna skang, adita sak ma·sina man·gijagipa manderangni silchidare ra·e re·ruraani bidingo kobor on·aniko knasona man·skaaha aro ian Garo Hills-o bobil dake chakatgipa dolrang tangchabapiltaiengama ine sing·aniko ong·katataha.
Kobor on·ani gitade, North Garo Hills a·jani Rongrong jolo ma·sina man·gija manderangni silchidare ra·e re·ruraaniko nikna man·ahachim aro ia manderang, politician saksani nokko sing·engachim.
Da·o dipet iani bidingo name talbrekujaengoba, North Garo Hills a·jani Superintendent of Police (SP) AT Sangma-o sing·sandiaton, Rongrong jolo adita sak manderangni silchidare ra·bite re·ruraaniko knasona man·aha indiba Rongrong jolni mitam bakrangde East Garo Hills a·jani ning·o ga·akani gimin, a·ja damgnini police-rangkon ia manderangko sandina watatmanaha ine parakataha.
Ia manderangara dakait dake cha·giparangsama ma badiaba dolni manderang da·o gital dake dolko bikottaina am·giparanganma name ma·sikujaenga ineba SP parakataha.
North Garo Hills a·jao bobil dake chakattaina sigipa dolrang dongama ine sing·on da·o dipet iani bidingo aganna gita maming sakkirang dongkuja ine SP parakataha.
Batanggimin somoirango dingtang dingtang biaprangoniko silchidarerang baksa adita sak manderangko police-rang rim·na man·aha ineba ua parakataha.
