Dolbonga NGO-rangni parakatani gitade, Sixth Schedule-ko taridapanio ‘unrepresented tribes’ ingipa kattako ra·chapna gita ma·mongo BJP sorkarini ja·ku de·aniara Garo Hills-o songdongenggipa Koch, Boro, Hajong aro uandakgipa Hindu Tribal-rangko an·tangtangni vote bank dake salna ja·ku de·ani gitasa ong·enga aro ian mikkangchi Garo Hills-o meli-nangrime janggi tangpaenggipa dingtang dingtang Tribal jatrangni gisepo ding·chaogrikataniko ra·baani cholrang dongskaenga.
Sixth Schedule-ko taridapani bidingo da·o bon·kame tom·aniko ong·atna siengani giminsa an·tangtangni chanchianirangko on·china gita a·dok sorkari aro autonomous district council (ADC)-rangna ge·etaniko on·manaha ine janapatengon, ma·mong sorkarini iandake ja·ku de·aniko raken jegalchina gita NGO-rang, a·dokni Chief Minister Conrad Sangma aro GHADC-ni Chief Executive Membor Benedic Marak-ko didiataha.
Sixth Schedule-ko taridapna sienggipa Section 3, paragraph 2, (i) sub paragraph (1)-o, “Membor sakdokko governor seokgen, jeonin sakgnide me·chik aro sakbride unrepresented tribes-oniko songgen” ine sea gnangchim ine janapatengon, iani bidingo baditaba chang a·dok sorkari aro Home Ministry-ni official-rang baksaba chanchirimaha aro iako Meghalaya a·dokni dingtang dingtang NGO-rang, MITCRM-ni ning·o changni changni jegaltokahachim ine dolbonga NGO-rang parakataha.
“GHADC election-o Koch, Hajong, Rabha aro uandakgipa Tribal-rangni bak ra·aniko champengna niam dongjani gimin uamangba Sixth Schedule ning·o apsan bilkon man·paenga gita ong·enga. GHADC election-o Koch, Rabha ba Hajong jatrangoniko komibeoba candidate sakgnikode seokengani gimin ia apsan jatrangonikon membor sakbriko songdaptaigenchimode niamo gita ong·jaengaha,” ine dolbonga NGO-rang parakataha.
‘Unrepresented tribes’-oni songako man·na sikenga ong·ode uamang GHADC election-o susaskajana gita nangjawa ine janapatengon, uamangoni GHADC-oba MDC-rang aro Assembly-oba membor ong·e an·tangtangko ‘unrepresented tribes’ ine a·kanganiara kraani ong·ja ine NGO-rang parakataha.
NGO-rangni jegalaniko manigija Sixth Schedule-ko taridapanio ‘unrepresented tribes’ kattako ra·chapgenchimode jingjengatanirangko dakanggen ineba Garo Hills-ni dolbonga NGO-rang, mikrakataniko on·angaha.
