AMPATI: South West Garo Hills a·jao cooperative society-rangoni dolsa, Man·chak Integrated Village Cooperative Society (IVCS)-ni bilsi bonga gapaniko adita salrangna skang maniangaha aro ia IVCS-ni bilsi bonga gapaniko maniani bak gita da·o bilsi bongana gital management committee-ko songe on·angan baksana dingtangmancha milsi pesusaanikoba Rerapara C&RD Block-ni ning·o donggipa Dengnakpara songo ong·atangaha.
Ia program-ko ong·atanio Rerapara Block-ni BDO RZD Shira, mongsonggipa sokgipa ong·e bakko ra·angaha aro a·jani dingtang dingtang officer-rangba dongpae bak ra·angtokaha.
Ia Man·chak IVCS-ko 2016-17 bilsirango cooperative society ine bimingko segatahachim aro ia society-o SWGH a·jaonisan ong·aigija gipin biaprangoniba gimik sak 350-mangni gita membor-rang donga.
Ia Man·chak IVCS-ko biming segatchengaonin, jolni manderang gipin biaprangoniko me·su samjak aro na·tokrangko brena nangjana gita ong·telaigipa a·salrangchi gama ge·anirangko aro na·tok jilanirangko dakna a·bachengaha.
Ia sal somoirango chadamberangna sorkarini kamrangko tikate on·na man·jaengahani gimin chadamberangna janggi tangani cholrangko on·na gita ia Man·chak IVCS-ni gita dingtangmancha a·sal tariani aro jakni kamrangni giminba skie on·angahachim.
Ia Man·chak IVCS-ni mongsongbatgipa chu·sokaniara 2017-18 bilsini Blue Revolution scheme-ni ning·o Oxygenated Van-ko man·anian ong·aha, jeon ia society, Fisheries department-ni gita 60%-ko aro an·tangtangni 40%-ko on·gilanichi gimik gong lak 11.66 tangkarangchi ia scheme-ko ra·gatna man·aha. Ia oxygenated van-an jolo na·tok jile cha·enggipa manderangna tanggipa na·tok bitchi aro na·tok bi·sarangko on·na dakchakenga.
Man·chak IVCS-ni bilsi bonga gapaniko manianio ia society-ni dilgipa BA Sangma aro bak man·paenggipa Chesterfield Sangma, ia IVCS-ni kamrangni bidingo jinmana talate on·angengon, re·baenggipa October jani 2 tariko Gandhi Jayanti-ko maniani bak gita dingtangmancha milsi pesusaaniko ong·atangtaigen ine parakangaha.
