TURA: Sukrobar salo Garo Hills-ni Nokma Council aro dingtang dingtang dolrang tom·e chanchirimangenba, Constitution-ni Sixth Schedule-ko taridapanio Village Council aro Municipal Council-ko Meghalaya sorkarini recommend ka·aniko jegalangaha aro sorkarini recommendation-ko ra·pilchina dabiangtokaha.
“Sixth Schedule ning·o Village Council aro Municipal Council-ko ra·gataniara A·chikrangni sason ka·ani bewal aro niam bidikko pe·ani gita ong·gen ine niksamsoengani gimin chinga ma·mong sorkarina recommend ka·aniko chu·gimik ra·pilchina Meghalaya sorkariko didina tik ka·aha,” ine Garo Hills-ni dingtang dingtang dolrang baksa tom·e chanchirimani ja·mano Nokma Council-oni seachi parakataha.
Iani bidingo Garo Hills-ni manderangna mikrakataniko on·na aro ia ja·ku de·aniko jegalna gita re·baenggipa September-ni 6 tariko jinma tom·aniko Tura Balading-o donggipa Nokma Council office-o ong·atna tik ka·angaha ineba Nokma Council aro dingtang dingtang dolrang parakataha.
