TURA: West Garo Hills a·jaoba COVID-19-ni batrikrikaniko warachakangkuna gita lockdown-ko ra·gatkuengon, manderangni namgnina district administration, dingtang dingtang niamrangko re·baenggipa September 13 tarikona donangtaiaha.
Dokkanrangko kuliani bidingo talataniko on·angengon, pilak dokkanrangkon Sombar saloni Sonibar salona attam 8:00 bajiona kulina man·gnok ine West Garo Hills a·jani Deputy Commissioner u·iataha.
Dokkanrangko kuliengon dokkano dongtimgipa ba dokkan nokgiparangni tika su·a su·gijaniko see tape donchina gitaba Deputy Commissioner u·iataha.
West Garo Hills a·ja gimikon antio changprak cha·enggipa bazar antirangkode chipe donangkugen ineba Deputy Commissioner u·iataha.
Sorkari office-rangkoba, ma·mong sorkarini office-rangko man·chape West Garo Hills a·ja gimikon pring 10:00 bajioni attam 5:00 bajiona kulina man·gnok ine DC parakataha.
Gilja nok, skul, college aro uandakgipa biaprangkoba sorkarini dongimin niamrangko pangchake kuliangchina gita Deputy Commissioner ge·etaniko on·ataha.
Walantian attam 9:00 bajioni pring 5:00 bajionade corona curfew-ko ong·atangkugen ineba DC parakataha.
